Каманда «Арт Сядзібы» вызначыла пераможцаў творчага конкурсу «Сымбаль натхнення — Беларусь!» Перамаглі тры дзяўчыны: Дзіяна Чэб, Ганна Шэўчык і Яўгенія Купрацэвіч.
Па выніках разгляду і абмеркаванняў атрыманых на конкурс працаў, аўтары трох лепшых праектаў, якія абрала каманда «Арт Сядзібы» з улікам меркаванняў аўдыторыі нашага сайта і сацсетак, атрымаюць ганарары за 1, 2 і 3 месцы — 600, 400 і 200 BYN адпаведна.
Працы-пераможцы з захаваннем пазнак аўтарства будуць увасобленыя ў новых прадуктах крамы Symbal.by.
3 месца: Дзіяна Чэб
Дызайны, якія прапанавала на конкурс Дзіяна Чэб, будуць увасоблены на новых цішотках і іншых сувенірных рэчах.
На серыю прынтоў «Купалле», «Валошкі» і «Бусел» аўтарку натхніў наш родны край. У прынтах яна спалучала смелую фактуру, характэрную свайму стылю, народныя вобразы і сымболіку, знаёмую кожнаму з маленства. Сваімі ілюстрацыямі Дзіяна імкнецца ўнесці нешта новае і незвычайнае.
2 месца: Ганна Шэўчык
Ганна Шэўчык распрацавала серыю паштовак «Вобразы любай краіны», якая прысвечана беларускім гарадам з прымаўкамі і крылатымі выразамі ды адметнасцямі гэтых мясцінаў.
Паштоўкі зараз дарабляюцца і афармляюцца ў адным стылі. На іх будуць размешчаны архітэктурныя помнікі, якія з’яўляюцца своеасаблівымі сімваламі гарадоў, у якіх яны знаходзяцца.
Спачатку выйдзе сувенірны камплект паштовак, а бліжэй да новага году — каляндар на 2018 год «Вобразы любай краіны» з 12-цю гарадамі і арыгінальнымі малюнкамі Ганны Шэўчык. Кожны сюжэт паштовак дадаткова будзе зроблены ў выглядзе анімаванай паштоўкі.
Паштоўкі характарызуюцца ўласнымі шрыфтамі і графікай. На погляд аўтаркі, такія рэчы здольныя падняць узровень нацыянальнай самасвядомасці, а таксама зацікавіць замежных гасцей гарадамі нашай краіны. Плюс гэта выдатны шанец вывучыць прымаўкі і крылатыя выразы па-беларуску!
1 месца: Яўгенія Купрацэвіч
Яўгенія Купрацэвіч распрацавала маляўнічы артбук «Zavalnia» паводле кнігі Яна Баршчэўскага «Шляхціц Завальня, або Беларусь у фантастычных апавяданнях», які правядзе вас у таямнічы свет беларускіх легенд і забабонаў.
Візуальны стыль заснаваны на творчасці Валерыя Славука і яго ілюстрацыях да «Шляхціча Завальні», а таксама на папулярнай кнізе з 90-х «Заклятыя скарбы».
Артбук будзе складацца з 60 мастацкіх ілюстрацый з сюжэтамі з арыгінальнай кнігі і 12 апавяданняў у форме цытат і visual first-фармат, які лёгкі да ўспрымання.
Зараз Яўгенія актыўна працуе над ілюстрацыямі, і мы плануем разам прэзентаваць выданне шырокай аўдыторыі напрыканцы восені. Суправаджаць выданне кнігі будуць разнастайныя тэматычныя мерапрыемствы і прома-прадукты з вобразамі Яна Баршчэўскага ў выкананні пераможцы нашага конкурсу.
Віншуем пераможцаў!
Топ-23 прац творчага конкурса «Сымбаль натхнення — Беларусь!» глядзіце тут.
З усімі конкурснымі працамі ды іх аўтарамі, у тым ліку і тымі, што не трапілі ў топ-23, можна пазнаёміцца ў адмысловым альбоме конкурсу.
