Запрашаем далучацца да святкавання Дня роднай мовы ў розных кутках Беларусі: з 21 да 23 лютага імпрэзы адбудуцца не толькі ў Мінску, але і ў Брэсце, Бабруйску, Віцебску, Гродне і Магілёве!
21 лютага запрашаем у кавярню «Грай» адзначыць Дзень роднай мовы. Канцэрт ладзіцца з нагоды Міжнароднага дня роднай мовы і ў межах кампаніі #беларускамоўны, пра якую падрабязней можна даведацца на Belsat.eu.
Падчас свята выступяць беларускія паэты і музыкі, сярод якіх гурт AKUTE, UZARI, рэпер ANGST, Усевалад Сцебурака, Наста Кудасава, Марыя Мартысевіч, Стась Карпаў. Культурніцкая праграма будзе жывой і насычанай, а кожны жадаючы зможа ўзяць удзел у шоў «Самшазам». Таксама на другім паверсе прасторы «Грай» будуць дзейнічаць пляцоўкі настольных гульняў, дзіцячых забаў і невялічкі кірмаш.
Адмыслова да Дня роднай мовы каманда Say.by прэзентуе новую версію мабільнага дадатку для размоваў па-беларуску ў сферы абслугоўвання і штодзённым жыцці.
Госці свята змогуць узяць удзел у квэстах з ужываннем дадатку, а самыя актыўныя — атрымаюць цікавыя прызы і падарункі.
21 лютага ў свеце адзначаецца Міжнародны дзень роднай мовы. У гэты дзень ва ўніверсітэтах і клубах Беларусі праходзяць адмысловыя мерапрыемствы і акцыі, у сацыяльных сетках і СМІ з’яўляюцца шматлікія конкурсы і публікацыі, прысвечаныя беларускай мове.
Мы хочам паказаць, што беларуская мова не толькі жыве і развіваецца, але і натхняе шматлікіх людзей на цікавыя і яскравыя праекты, акрыляе на добрыя справы.
Уваход вольны, але варта зарэгістравацца тут.
Інфалінія: +375 25 996 93 76.
Кафэ «Грай», вул. Інтэрнацыянальная, 33.
Пачатак а 18:00.
Мы сабралі мерапрыемствы прысвечаныя Міжнароднаму дню роднай мовы, якія адбудуцца ў розных гарадах Беларусі.
Брэст, 21 лютага
Літаратурна-музычнай замалёўкай «Хутка вясна» адзначаць свята ў Брэсце. Літаратурную частку прадставіць пісьменніца Наталля Харытанюк, а музычную — Алесь Камоцкі і Алеся Сівохіна.
Прастора «Дзедзіч» (вул. Маякоўскага, 46). Пачатак а 18-й. Уваход вольны!
Магілёў, 21 лютага
Магілёў наведае пісьменнік і журналіст Алесь Кіркевіч, які правядзе ў Цэнтры «Кола» творчую сустрэчу. А клуб «Волат» прэзентуе магілёўцам сваю «Рыцарскую праграму»: выстава даспеху, сапраўдныя баёўкі на мячах ды шаблях, цікавыя факты пра ўзбраенне нашых продкаў, конкурсы.
Цэнтр «Кола» (зав. Чкалава, 16). Пачатак у 18.30. Уваход вольны!
Гродна, 21 лютага
У Гродне ў Цэнтры гарадскога жыцця адбудзецца канцэрт Змітра Вайцюшкевіча.
Прастора «У цэнтры» (вул. Кірава, 3). Пачатак а 19-й. Уваход вольны!
Віцебск, 22 лютага
А на наступны дзень, 22 лютага, у Віцебску адбудзецца творчы вечар Андруся Такінданга.
Арт-паб «Торвальд» (вул. Талстога, 1). Пачатак а 19-й. Уваход вольны!
Бабруйск, 23 лютага
Завершыцца святкаванне Дня роднай мовы ў Бабруйску 23 лютага, дзе адбудзецца «Спеўны сход» са Змітром Вайцюшкевічам, а моўныя курсы «Мова Нанова – Бабруйск» адсвяткуюць сваё пяцігоддзе. Акрамя гэтага адбудуцца выступы мясцовых гуртоў.
Крэатыўная прастора «1387» (вул. Чангарская, 54). Пачатак а 18-й. Уваход вольны!
Імпрэзы адбудуцца ў межах грамадскай кампаніі «Беларускамоўны», якая мае на мэце дасягнуць рэальнага моўнага раўнапраўя ў Беларусі і прымеркаваная да чарговага перапісу насельніцтва, які адбудзецца ў нашай краіне сёлета.
Святкуем Дзень роднай мовы разам!
Перакананыя, што гэта далёка не ўсе. Дасылайце нам на скрынку symbalby@gmail.com інфармацыю і анонсы, калі таксама ладзіце івэнты да Дня роднай мовы і хочаце каб мы пра іх распавялі.
