У падтрымку «Мова Фэсту» генеральны партнёр свята бровар «Аліварыя» і блогерка ды вядучая Ганна Бонд запусцілі чэлендж «Вывучы беларускую мову да “Мова Фэсту”».
Ганна Бонд апублікавала ў інстаграме зварот, дзе запрасіла сваіх падпісантаў на «Мова Фэст» і прапанавала ўзгадаць цікавыя беларускія словы, падзяліцца імі са сваімі падпісантамі і перадаць эстафету далей. Любімае беларускае слова Ганны Бонд «імбрык», а перадала яна эстафету музыку Мікіце Найдзёнаву, журналісту Антону Мартыненку і гурту «NaviBand».
Каб далучыцца да чэленджу, трэба апублікаваць у сторыс інстаграма сваё любімае беларускае слова, адзначыць хэштэг #мовафэст і акаўнт @alivariabelarus.
Пра свае першыя ўражанні ад чэленджу распавядае Ганна Бонд:
— Не чакала такой актыўнасці, людзі дасылаюць і дасылаюць словы: пыска, крэйда, буська, цмок, патэльня, смоўж, спатканне, пачвара і яшчэ сотні ды сотні слоў. Розныя рэакцыі атрымліваю: нехта кажа «ганьба», за тое як я размаўляю па-беларуску, а нехта – малайчынка, што спрабуеш і нам даеш прыклад. Я адмыслова ў сваім звароце паказала, што не дасканала валодаю беларускай мовай, але хачу і буду гэта выпраўляць. Бо калі цурацца і не спрабаваць гаварыць, то ніколі не загаворыш і застанецца казаць беларускамоўным людзям пры сустрэчы: як ты прыгожа гаворыш, а я так не магу. Спрабуйце, рабіце першы крок, не бойцеся рабіць памылак і беларуская мова загучыць і з вашых вуснаў.
Вучыце новыя словы і прыходзьце 22 лютага ў культурны хаб «ОК16» на «Мова Фэст». Бровар «Аліварыя» арганізуе на свяце сваю фестывальную зону, дзе вы зможаце праверыць моўныя веды, прайсці гістарычны квіз і атрымаць падарункі.
Адным з галоўных падарункаў для ўдзельнікаў акцыі і конкурсаў на «Мова Фэст» стане лімітаваная серыя цішотак «Мова», якую спецыяльна да фестывалю выпусцілі разам «Аліварыя» і кампанія Symbal.by. Набыць цішоткі таксама можна ў фірмовай краме Symbal.by ў Мінску на пр-це Машэрава, 18.
«Аліварыя» займае актыўную пазіцыю па падтрымцы ініцыятыў, накіраваных на развіццё беларускай мовы. У скарбонцы кампаніі шмат беларускамоўных і беларускаарыентаваных праектаў. Сярод якіх, напрыклад, аднаўленне духоўнай і матэрыяльнай спадчыны вядомага мінскага галавы Караля Яна Чапскага. Шмат гадоў «Аліварыя» з’яўляецца арганізатарам і сябрам фестывалю беларускамоўнай рэкламы «ADNAK!». Брэнд актыўна падтрымлівае беларускі спорт і запрашае «заўзець па-беларуску» на футбольных і хакейных матчах нацыянальных каманд.
Арганізацыя ўнікальнага свята «Мова Фэст», прымеркаванага да Міжнароднага дня роднай мовы, з’яўляецца яшчэ адным крокам да папулярызацыі і падтрымкі роднага слова. Бо менавіта беларуская мова з’яўляецца тым скарбам, што яднае ўсіх беларусаў, тым падмуркам, на якім мы разам будуем нашу агульную гісторыю.
Поўная праграма свята на старонцы movafest.by.
